En joa heur, veur dat se het wèts is het joar alweer veurbie. Het woar alweer tied veur de lètste activiteit van 2025 veur de TR vriendenclub Limburg: de wildrit op 2 november, 2025. Deze rit woor georganiseerd door Joep Wielders en Jeroen Hovens. Zoaterdig, de daag veur de rit, woar het versjrikkelik sjleg wear en reagende het zoget de ganse daag. Ver heele de veursjpellinge veur de zonjig 2 november good in de gate, en het leek drop dat het waal gèt beater zouw weare. Toch mèr ‘t kèpke drop veur de mörge, eavekes tenke, en zo zeen ver kloar veur de wildrit.
Sjmörges woar het frisj, mèr waal dreug, gelökkig. Der hèjje zich veerentwintig equipes opgegeave, en dat woare der 4 meer es dat der eigelik mit kooste doon. Ver woore om teen oer verwach bie Gasterie de Knip (hoeskamer aan de maas) in Wessem. Onger het genot van ein lekker sjtökske vlaai en get te drènke kooste ver gezellig biekletse. Leuk om eederein weer te zeen en oug om nuuj luuj te lere kènne.
Om 11 oer krege ver oetlèk euver de route, en omdat eemes dit versjlaag moos sjrieve, hèj Jeroen bedach dat ver mooste roaje wievoal Sidescreen TR’s der woare geboewd tösje 1953 en 1962. Degene die der ‘t verst vanaaf zoate zouwe het versjlaag motte sjrieve. En doordat ich (Doreen) ein 0 vergeate woar achter het aantal ‘3500’ woare veer de klos (hahaha). Eederein vertrok noa boete en bienoa alle kèpkes verdwene in de kofferbakke omdat ‘t zunke probeerde door te breake.
Ver reeje door ein prachtige natuur, van Hunsel, door Ell, Stramproij, noa Bocholt en door noa Maarheze en Someren richting Neerkant. Het woar ein geweldige route!Om ongeveer ein oer koame ver aan bie oos lunchadres: d’ Ouwe Peel in Helenaveen. Het woar der heel gezellig! Eederein genoot van ein 12-uurtje, sandwich drieluik of ein heerlijke salade mit brie.
Noa de lunch ginge ver wiejer; ver hèjje nog ein flink ritje veur de boeg. En weer reeje ver door ein prachtige omgeaving van Grashook noa Beringe, Panninge, Neer, noa ut vearpontj Kessel-Beesel. Aan de euverkantj vormden zich langzaamaan dikke donkere wolke. Mèr veer zeen gein watjes, dus eederein reej zonger kèpke dapper door. Wat ein prachtige route! Ver ginge van Beesel wiejer noa Remunj, Asselt, Sjwalme, Boukoul, weer door Remunj, noa Melick en dan richting Sint Odiliënberg. Het woor donkerder en donkerder… Doa koame de eerste dröppels! Aan eine kantj woare de wolke donkergries en aan de angere kantj woar de loch blauw, mèr oeteindelik veele de dröppels mit – gelökkig!
Van Sint Joos richting Maasbrach, reeje ver via Stevensweert, Ohé en Laak noa Wessem en zo koame ver rondj vief oer aan bie het eindpunt van de rit woo os in Gasterie de Knip ein fantasties wilddiner te wachte sjtong. Het eate woar perfek! Lof aan de kok! Het personeel, zo leuk, gezellig en vrunjtelik: zeker eine aanroajer! Het woar eine heerlikke, gezellig aovend!
Dank aan de here van de organisatie – Jeroen en Joep – veur de prachtige, good georganiseerde route, en het lekkere eate in de gezellige restaurants.
PS: tiedens de oavend krége ver het verzeuk om dees teks in ozze sjtreektaal te sjrieve -dus bie deze! Veur degene die dit neet kènne leaze, die kènne zich effe bie os mèlje (dan moage die het volgend joar weer in ‘t hollesj sjrieve).
Groetjes van Doreen en Marco
Voor foto’s zie de fotoalbum met foto’s van Ron, Sandra, Peter Marco, en Rien